«Aýdyň Gijeler» kompaniýasy bilen Daşkent şäher häkimliginiň arasynda hyzmatdaşlyk hakynda Ähtnama gol çekildi

Şu gün «Aýdyň Gijeler» kompaniýasynyň Baş direktory bilen Daşkent şäheriniň häkiminiň arasynda resmi duşuşyk geçirildi. Duşuşygyň dowamynda taraplar Özbegistan Respublikasynyň çäginde senagat hyzmatdaşlygyny ösdürmek we bilelikdäki infrastruktura taslamalaryny durmuşa geçirmek meselelerini ara alyp maslahatlaşdylar. Gepleşikleriň netijeleri boýunça hyzmatdaşlyk hakynda Ähtnama gol çekildi. Resminama Özbegistanda «Aýdyň Gijeler» kompaniýasynyň täze önümçilik meýdançasyny döretmegi göz öňünde tutýar. Taslamany amala aşyrmak üçin umumy meýdany 4 gektar bolan ýer bölegi bölünip berildi. Täze önümçilik kärhanasy ýurduň iri ulag we infrastruktura taslamalary üçin önümleri öndürmäge gönükdiriler. Hususan-da, bu ýerde gurulýan häzirki zaman Daşkent – Samarkant awtomagistraly üçin zerur bolan önümler öndüriler. Önümçilik meýdançasynda ýol gorag päsgelçilikleri, ýol belgileri, yşyklandyryş diregleri we ýol hereketiniň howpsuzlygyny üpjün etmek üçin zerur bolan beýleki önümleri öndürmek meýilleşdirilýär. Bu taslamanyň durmuşa geçirilmegi Türkmenistan bilen Özbegistanyň arasyndaky ykdysady hyzmatdaşlygy has-da pugtalandyrmaga, täze iş orunlaryny döretmäge, häzirki zaman tehnologiýalaryny ornaşdyrmaga we sebitiň ulag infrastrukturasynyň ösüşine uly goşant goşmaga mümkinçilik berer. «Aýdyň Gijeler» kompaniýasy bildirilen ynam we goldaw üçin Daşkent şäheriniň ýolbaşçylygyna hoşallyk bildirýär, şeýle hem uzak möhletleýin we özara bähbitli hyzmatdaşlygy dowam etdirmäge taýýardygyny tassyklaýar.